"Nəsimi" Milli Ədəbiyyat Müsabiqəsi

Nəsimi Milli Ədəbiyyat Müsabiqəsinin qalibləri açıqlandı!

2010-12-26T00:24:00.002+04:00

Bu gün Beynəlxalq Mətbuat Mərkəzində Kultaz.com mədəniyyət portalının təşkilatçılığı ilə keçirilən III Nəsimi Milli Ədəbiyyat Müsabiqəsinin birinci mərhələsinin qaliblərinin mükafatlandırılma mərasimi keçirilib.

Tədbirdə tanınmış yazarlar, tənqidçilər, media nümayəndələri iştirak ediblər. Birinci mərhələdə nominatları 9 nəfərdən ibarət Ekspertlər Şurası irəli sürüb. Hər bir ekspert hər bir nominasiyada maksimum 5 kitab irəli sürmək hüququna malik olub. Nominant kitablar üçün Təşkilat Komitəsi tərəfindən ümumi kriteriyalar müəyyənləşdirilib. Bura həmin kitabların ictimai müzakirəyə səbəb olması, ədəbi tənqiddən peşəkar resenziyalar alması əsas götürülüb. Son 10 ilin ədəbi əsəri üçün isə ən azı bir xarici ölkədə nəşr olunması, ictimai müzakirəsi, yerli və xarici tənqiddən rəy alması kriteriyaları təyin edilib.

Ekspertlər Şurası 3 nominasiya üzrə qalibləri seçiblər:

1. Son 10 ilin ədəbi əsəri:
Kamal Abdullanın “Yarımçıq əlyazma” romanı

2. İlin romanı:
Nərmin Kamalın “Aç, mənəm” və Pərvizin “Yad dildə” romanları

3. İlin şeir kitabı:
Günel Mövlud, “5XL”

Paralel olaraq, Təşkilat Komitəsi hər 3 nominasiya üzrə yazarlar və oxucular arasında anket sorğusu keçirib. Ekspertlərin, yazarların və oxucuların səsverməsinin ortaq nəticəsi kimi isə müsabiqənin yekununda ən yaxşı kitablardan ibarət Qısa Siyahı tərtib olunub.

III Nəsimi Milli Ədəbiyyat Müsabiqəsi
QISA SİYAHI

Son 10 ilin ən yaxşı nəsr əsərləri (kitabları)

Kamal Abdulla “Yarımçıq əlyazma”
Aqil Abbas, “Dolu”
Anar, “Ağ qoç, qara qoç”
Sabir Rüstəmxanlı, “Ölüm zirvəsi”(Cavad xan)
Rafiq Tağı, Hekayələr- 2 cilddə
Əkrəm Əylisli, “Ətirşah masan”
Həmid Herisçi, “Nekroloq”
Məqsəd Nur, “Tərs kimi”
Fəxri Uğurlu, “Hekayələr”
Səfər Alışarlı, “Maestro”

Son 10 ilin ən yaxşı şeir kitabları

Ramiz Rövşən, “Nəfəs”
Səlim Babullaoğlu, “İlyas Köçmənin şəkilli dəftəri”
Əjdər Ol, “Günəbaxan zəmisi”
Vaqif Bayatlı Odər, “Yupyumru bir eşq ilə”
Aqşin Yenisey, “Unutmaq sözünün şəkli” (Sizin eradan əvvəl)

2010-cu ilin ən yaxşı romanları

Pərviz, “Yad dildə”
Nərmin Kamal “Aç mənəm”
Aqşin, “Göləqarğısancan”
İlqar Fəhmi, “Bakı tarixindən kollaj”
Qaraqan, “A”
Kəramət Böyükçöl, “Çöl”

2010-cu ilin ən yaxşı şeir kitabları

Günel Mövlud, “5XL”
Səlim Babullaoğlu, “Polkovnikə heç kim yazmır”
II Qismət, “Vitrin”
Zahid Sarıtorpaq, “Üfürülmüş çırağın ruhu”
Cavidan, “Bu şeir deyil”

Nəsimi Milli Ədəbiyyat Müsabiqəsinin birinci mərhələsi başa çatdı

2010-12-22T20:49:00.001+04:00

10 ilin və bu ilin ən yaxşı əsərləri müəyyən edildi

III Nəsimi Milli Ədəbiyyat Müsabiqəsinin birinci mərhələsi başa çatıb. Müsabiqənin qalibləri dekabrın 25-də saat 13-00-da Beynəlxalq Mətbuat Mərkəzində (Mətbuat Prospekti, 529) keçiriləcək tədbirdə açıqlanacaq.

Xatırladaq ki, 9 nəfərdən ibarət Ekspertlər Şurası son 10 ilin ədəbi əsəri, ilin romanı və ilin şeir kitabı olmaqla 3 nominasiya üzrə qalibləri müəyyən ediblər. Bundan əlavə, təşkilatçıların yazarlar arasında keçirdiyi alternativ sorğunun da qalibləri – hər nominasiya üzrə ən yaxşı kitabların adları açıqlanacaq.

Tədbirə KİV nümayəndələri və yazarlar dəvətlidir.

Xatırladaq ki, müsabiqənin ikinci mərhələsi- Debüt nominasiyasının qalibləri isə gələn il fevralın 2-də elan olunacaq. (Debüt nominasiyasına əsərlərin qəbulu dekabrın 25-də başa çatır: ətraflı məlumat üçün bu linkə bax)

Qeyd edək ki, Nəsimi Milli Ədəbiyyat Müsabiqəsi 2008-ci ildən etibarən hər il keçirilir. Müsabiqənin təşkilatçısı Kultaz.Com mədəniyyət portalıdır.

Ən yaxşı kitablar: sorğunun ilkin nəticələri

2010-12-22T20:46:00.001+04:00

Kultaz.Com saytı III Nəsimi Milli Ədəbiyyat Müsabiqəsi çərçivəsində ədəbi ictimaiyyət arasında geniş sorğu keçirir.
Sorğuda yazarlar, tənqidçilər, filoloqlar iştirak edə bilər. Bu məqsədlə hazırlanmış xüsusi sorğu anketi 200-dən çox ədəbiyyat adamının elektron ünvanına göndərilib.

Sorğunun məqsədi III Nəsimi Milli Ədəbiyyat Müsabiqəsinin 3 nominasiyası (son 10 ilin bədii əsəri, ilin romanı, ilin şeir kitabı) üzrə alternativ qalibləri seçməkdir. Bəlli olduğu kimi, müsabiqənin qaydalarına uyğun olaraq, bu nominasiyalar üzrə qalibləri 9 nəfərdən ibarət Ekspertlər Şurası seçəcək. Bununla belə, ədəbi ictimaiyyət arasında keçirilən sorğunun nəticələri də müsabiqənin sonunda rəsmən elan olunacaq.

Bir daha vurğulayırıq ki, sorğuda Azərbaycan vətəndaşı olan yazarlar, tənqidçilər, filoloqlar iştirak edə bilər. Sorğuda iştirak edəcək hər kəsə öncədən təşəkkür edirik.

Bu günə olan nəticələrə görə, hər 3 nominasiyada öndə olan 5 kitabın adını təqdim edirik:

1. Son 10 ilin ən uğurlu bədii əsəri

- “Yarımçıq əlyazma” (Kamal Abdulla)
- “Ətirşah masan” (Əkrəm Əylisli)
- “Nekroloq” (Həmid Herisçi)
- “İlyas Köçmənin şəkilli dəftəri” (Səlim Babullaoğlu)
- “Dolu” (Aqil Abbas)

2. İlin romanı

- “Aç, mənəm” (Nərmin Kamal)
- “Göləqarğısancanlar” (Aqşin Yenisey)
- “Yad dildə” (Pərviz)
- “Bakı tarixindən kollaj” (İlqar Fəhmi)
- “Çöl” (Kəramət Böyükçöl)

3. İlin şeir kitabı

- “5XL” (Günel Mövlud)
- “Vitrin” (II Qismət)
- “Polkovnikə heç kim yazmır” (Səlim Babullaoğlu)
- “Üfürülmüş çırağın ruhu” (Zahid Sarıtorpaq)
- “Bu şeir deyil” (Cavidan)

III “Nəsimi” Milli Ədəbiyyat Müsabiqəsi: yeni qaydalar, geniş imkanlar

2010-11-09T15:24:00.001+04:00

III “Nəsimi” Milli Ədəbiyyat Müsabiqəsi start götürür. Əvvəlki illərdə yalnız gənc imzaların əsərlərini əhatə edən müsabiqənin qaydalarında bu ildən etibarən əhəmiyyətli dəyişikliklər edilib.

Təşkilat Komitəsinin qərarına əsasən “Nəsimi” MƏM bundan sonra iki mərhələdə keçiriləcək.

I MƏRHƏLƏ

Bu mərhələdə seçim və dəyərləndirməni NƏSİMİ MƏM-in Ekspertlər Şurası aparır. Ekspertlər Şurası Təşkilat Komitəsinin (3 nəfər) və tərkibi hər il dəyişən münsiflər heyətinin (6 nəfər) üzvlərindən formalaşır. Hər bir ekspert öz seçiminə uyğun olaraq, hər bir nominasiya üzrə maksimum 5 əsəri ümumi qiymətləndirməyə təqdim edir. Hər bir əsər 10 ballıq sistemlə dəyərləndirilir. Ən çox bal toplayan əsər uyğun nominasiya üzrə qalib elan edilir.

Bu mərhələdə ümumi qiymətləndirməyə müəlliflərdən əsər qəbul olunmur.

1. Baş mükafat
Son 10 ilin ədəbi əsəri

Bu nominasiya 10 ildən bir elan edilir.
Tələblər: Nominasiyaya 2001-2010-cü illər ərzində Azərbaycanda dərc olunmuş nəsr və şeir kitabları təqdim oluna bilər. Son 10 ildə ən azı bir xarici ölkədə dərc olunan, yerli və xarici mətbuatda müzakirəyə səbəb olan, haqqında peşəkar resenziyalar dərc edilən, müzakirə doğuran əsər və ya kitablara üstünlük verilir.

Qalibin adı 25.12.2010-cu il tarixində açıqlanacaq.

2. İlin romanı
3. İlin şeir kitabı

Bu nominasiyalar üzrə müsabiqə hər il élan edilir.
Tələblər: Son bir il ərzində kitab halında dərc olunmalıdır. Dəyərləndirmədə mövzu aktuallığı, üslub, təhkiyə və forma axtarışlarına önəm verilir. Peşəkar resenziyalar, ədəbi tənqidin reaksiyası nəzərə alınır.

Qaliblərin adları 25.12.2010-cu il tarixində açıqlanacaq.

II MƏRHƏLƏ
“Debüt”

Nəsimi MƏM-də “Debüt” nominasiyası yeni istedadların üzə çıxarılması, təbliği və dəyərləndirilməsi məqsədilə yaradılıb. Müsabiqəyə əsərlərin qəbulu dekabrın 25-də başa çatır. Nəticələr hər il fevralın 2-də Gənclər Günündə elan olunur.

Bu nominasiyaya kitabı dərc olunmayan gənc müəlliflər, yeni imzalar qatıla bilər. Müsabiqə həm şeir, həm də hekayə alt-nominasiyaları üzrə keçirilir. Bir müəllif yalnız bir nominasiyada çıxış edə bilər. Mətnlər Azərbaycan dilində, Times New Roman şrifti ilə yazılmalı və elektron versiyada nesimi2010@gmail.com ünvanına göndərilməlidir. Müsabiqəyə indiyə qədər yazılı və ya elektron KİV-də nəşr olunmamış mətnlər iştirak edə bilər. Bundan əlavə, hər bir müəllif, öz bioqrafiyasını, əlaqə telefonlarını və bir ədəd rəngli fotoşəklini də mütləq qeyd olunan elektron ünvanına göndərməlidir. Hər bir müəllif müsabiqədə maksimum 3 (üç) şeir və ya 3 (üç) hekayə ilə iştirak edə bilər.

Seçim və dəyərləndirməni NƏSİMİ MƏM-in Ekspertlər Şurası aparır. Ekspertlər Şurası Təşkilat Komitəsinin (3 nəfər) və tərkibi hər il dəyişən münsiflər heyətinin (6 nəfər) üzvlərindən formalaşır. Mətnlər 10 ballıq sistemlə dəyərləndirilir. Ən çox bal toplayan əsər uyğun nominasiya üzrə qalib elan edilir.

II "Nəsimi" Milli Ədəbiyyat Müsabiqəsinin finalçıları açıqlandı

2009-11-30T14:35:00.000+04:00

30 noyabr 2009

Ortaya çıxan bəzi texniki problemlər üzündən keçirilməsi prosesində ləngimələr yaranan II "Nəsimi" Milli Ədəbiyyat Müsabiqəsi nəhayət ki, işini bərpa edib.
Xatırladaq ki, ənənəvi olaraq fevral ayının 2-də - Gənclər Günündə start götürən müsabiqədə iştirak etmək üçün ölkəmizdən, eləcə də İran, Rusiya və Fransadan 47 həmyerlimiz Təşkilat Komitəsinə müraciət edib. Onlardan 44-nün müraciəti müsbət qiymətləndirilib. Digər 3 nəfər isə- ikisi qaydalara əməl etmədiyinə, digəri isə adi davranış qaydaları və etik normalarla tanış olmadığına görə- müsabiqədən kənarlaşdırılıb.
Müsabiqənin I mərhələsində 43 nəfərin 140-dan artıq bədii mətni dəyərləndirilib.
İlkin dəyərləndirmələrdən sonra müsabiqənin final mərhələsinə 23 müəllifin 46 mətni adlayıb.
Müsabiqənin final mərhələsinə adlayan müəlliflər nominasiyalar üzrə aşağıdakılardır (sıralama şərtidir):

Proza

Cavid Zeynallı
Natiq Məmmədli
Arif Qasımov
Faiq Mirzəyev
Asiman Eyniyev
Natəvan Mikayılova
Cəlil Yurdsevən
Reyhan Şıxlı
Xatirə Sadıqova
Ayxan Kiçikbəy
Sahilə İbrahimova
Yeganə Məmmədova

Şeir

İmarət
Elvin Kədər
Ayaz Şirin
Aysel Novruzova
Vüsal Nuru
Sevil Bəhramova
Ay Han
Ruslan Ələkbərli
Sərxan Hüseynli
Zamir Ağazadə
Xaqani Əliyev

Finala adlayan müəlliflər arasından peşəkar münsiflər yanvarın 15-nə qədər hər nominasiya üzrə I, II və III yerlərin sahiblərini seçəcək.
Təşkilat Komitəsinin qərarına əsasən, qaliblərin adları yeni müsabiqənin başlanmasıyla eyni tarixdə- Fevralın 2-də elan olunacaq.

Müsabiqədə maksimum obyektivliyi təmin etmək üçün hər il dəyişən münsiflərin adları sonadək gizli saxlanılır və yalnız mükafatlandırma mərasimi zamanı açıqlanır.

Həmçinin dəyərləndirmə zamanı münsiflər hansı mətnin kimə aid olduğunu bilmir. Qiymətləndirmə hər mətn üzrə 10 ballıq sistemlə keçirilir.

Müsabiqənin təşkilatçıları “Lit.az” Ədəbiyyat Portalı və “Kultaz.com” Mədəniyyət Portalıdır.

"Nəsimi" Milli Ədəbiyyat Müsabiqəsinə əsərlərin qəbulu tarixi uzadıldı

2009-03-16T12:38:00.006+04:00

Artıq 40-dan artıq müraciət var

Fevralın 2-dən start götürən II Nəsimi Milli Ədəbiyyat Müsabiqəsi davam edir.
Xəbər verildiyi kimi müsabiqəyə əsərlərin qəbulu üçün son tarix martın 14-ü elan edilmişdi. Bu müddət ərzində müsabiqəyə Azərbaycanın müxtəlif bölgələrindən əksəri yeni imzalar olmaqla, 41 müəllif müraciət edib. Onlardan 38 nəfərin müraciəti qaydalara uyğun hesab edilərək, müsabiqəyə qəbul edilib.
Lakin son iki gün ərzində bir çox müəlliflər müsabiqədən gec xəbər tutduqlarını əsas gətirərək, Təşkilat Komitəsindən əsərlərin qəbulu tarixini daha bir neçə gün uzatmağı xahiş etmişlər. Təşkilat Komitəsi Münsiflər Heyəti ilə birgə qapalı görüşündə bu xahişləri və bir çox digər sualları müzakirə edərək, bir sıra qərarlar qəbul edib.
Qərara görə, əsərlərin qəbulu tarixi 6 aprel 2009-cu il tarixinə qədər uzadılıb. Müsabiqənin final tarixi- 28 may dəyişməz qalıb. Final mərhələsinə keçən müəlliflərin adları mayın ilk ongünlüyündə açıqlanacaq.
Təşkilat Komitəsi daha bir məsələyə də aydınlıq gətirməyi lazım bilir. Bu, müsabiqənin şərtlərində yer alan "Nəsimi Milli Ədəbiyyat Müsabiqəsinin əvvəlki qalibləri yenidən müsabiqəyə qatıla bilməz" qeydi ilə bağlıdır. Bildiririk ki, qaliblər yalnız şeir və hekayə nominasiyaları üzrə I yeri qazananlar hesab olunur. II və III yerin sahibləri isə müsabiqəyə təkrar başvurmaq hüququna malikdir.
Qeyd edək ki, müsabiqəni Kultaz.com - Mədəniyyət Portalı və Lit.az- Ədəbiyyat Portalının birgə təşkilatçılığı ilə keçirilir.
Bir daha xatırladaq ki, müsabiqənin şərtlərinə görə kitabı çap olunmayan müəlliflər maksimum 3 şeir və ya 3 hekayə ilə yarışmaya qatıla bilərlər. Müsabiqəyə heç bir elektron və yazılı KİV-də dərc olunmamış mətnlər qəbul edilir. Müəlliflər şeir və hekayələrini, bir ədədd foto və müəllif haqqında kiçik tanıtım da daxil olmaqla, 6 aprel tarixinə qədər musabiqe2009@gmail.com ünvanına göndərə bilərlər.

II "Nəsimi" Milli Ədəbiyyat Müsabiqəsi start götürdü

2009-02-02T22:37:00.002+04:00

II "Nəsimi" Milli Ədəbiyyat Müsabiqəsi start götürdü. Ötən ildən keçirilməsinə başlanan "Nəsimi" Milli Ədəbiyyat Müsabiqəsi yeni istedadların, uğurlu bədii mətnlərin üzə çıxarılması, təbliği və dəyərləndirilməsi qiymətləndirilməsi məqsədilə yaradılıb. Müsabiqənin təsisçiləri Kultaz.com (Azərbaycan Mədəniyyət Portalı) və Lit.az (Azərbaycan Ədəbiyyat Portalı) saytlarıdır.
Müsabiqə hər il fevralın 2-də - Gənclər Günündə başlanır və may ayının 28-də-Respublika Günündə qaliblərin rəsmən elan olunması ilə yekunlaşır.

"Nəsimi" Milli Ədəbiyyat Müsabiqəsinə qatıldığı nominasiya üzrə kitabı dərc olunmayan gənc müəlliflər, yeni imzalar qatıla bilər. Müsabiqə həm şeir, həm də hekayə nominasiyaları üzrə keçirilir. Bir müəllif yalnız bir nominasiyada çıxış edə bilər. Mətnlər Azərbaycan dilində, Times New Roman şrifti ilə yazılmalı və elektron versiyada musabiqe2009@gmail.com ünvanına göndərilməlidir. Müsabiqəyə indiyə qədər yazılı və ya elektron KİV-də nəşr olunmamış mətnlər iştirak edə bilər. Bundan əlavə, hər bir müəllif, öz bioqrafiyasını, əlaqə telefonlarını və bir ədəd rəngli fotoşəklini də mütləq qeyd olunan elektron ünvana göndərməlidir. Hər bir müəllif müsabiqədə maksimum 3 (üç) şeir və ya 3 (üç) hekayə ilə iştirak edə bilər. Müsabiqə iki turdan ibarətdir:

Birinci tur. Hər il martın 15-də I seçim turu yekunlaşır. Mətnlərin son göndərilmə tarixi isə bundan bir gün qabaq- martın 14-də başa çatır.

İkinci tur. II tura 5 nəfər peşəkardan ibarət münsiflər heyətinin seçdiyi ən dəyərli mətnlər adlayır. Onların arasından isə I, II və III yerlərə layiq görülənlər seçilir. Qaliblərin adları hər il may ayının 28-də elan edilir. Müsabiqədə maksimum obyektivliyi təmin etmək üçün hər il dəyişən münsiflərin adları sonadək gizli saxlanılır və yalnız mükafatlandırma mərasimi zamanı açıqlanır. Həmçinin dəyərləndirmə zamanı münsiflər hansı mətnin kimə aid olduğunu bilmir.

Xüsusi qeyd: "Nəsimi" Milli Ədəbiyyat müsabiqəsinin qalibləri müsabiqəyə təkrar qatıla bilməz.

I "Nəsimi" Milli Ədəbiyyat Mükafatı-2008

2008-02-05T23:55:00.004+04:00

"Nəsimi" Milli Ədəbiyyat müsabiqəsi yeni istedadların, uğurlu bədii mətnlərin üzə çıxarılması, təbliği və dəyərləndirilməsi, eləcə də cari ildə çap olunmuş dəyərli əsərlərin qiymətləndirilməsi məqsədilə yaradılıb. Bu ədəbi müsabiqənin təsisçiləri kultaz.com (Azərbaycan Mədəniyyət Portalı) və lit.az (Azərbaycan Ədəbiyyat Portalı) saytlarıdır.

Müsabiqə il boyu iki mərhələdə davam edir. Birinci mərhələdə yeni imzaların, gənc istedadların üzə çıxarılması və təbliği prosesi həyata keçirilir. Bu mərhələ hər il fevralın 2-də - Gənclər Günündə başlanır və may ayının 28-də-Respublika Günündə qaliblərin rəsmən elan olunması ilə yekunlaşır. İlin ikinci yarısında isə il boyu dərc olunan əsərlərin, kitabların, tərcümələrin dəyərləndirilməsi aparılır və onların arasından ən yaxşıları seçilərək mükafatlandırılır.

Birinci mərhələ. "Nəsimi" Milli Ədəbiyyat Müsabiqəsinin I mərhələsinə (2 fevral-28 may) yalnız kitabı dərc olunmayan gənc müəlliflər, yeni imzalar qatıla bilər. Müsabiqə həm şeir, həm də hekayə nominasiyaları üzrə keçirilir. Bir müəllif yalnız bir nominasiyada çıxış edə bilər. Mətnlər Azərbaycan dilində, Times New Roman şrifti ilə yazılmalı və elektron versiyada musabiqe2008@gmail.com ünvanına göndərilməlidir. Bundan əlavə, hər bir müəllif, öz bioqrafiyasını, əlaqə telefonlarını və bir ədəd rəngli fotoşəklini də mütləq qeyd olunan elektron ünvana göndərməlidir. Hər bir müəllif müsabiqədə maksimum 3 (üç) şeir və ya 3 (üç) hekayə ilə iştirak edə bilər. Müsabiqə iki turdan ibarətdir:

Birinci tur. Hər il martın 15-də I seçim turu yekunlaşır. Mətnlərin son göndərilmə tarixi isə bundan bir gün qabaq-martın 14-də başa çatır.

İkinci tur. II tura 5 nəfər peşəkardan ibarət münsiflər heyətinin seçdiyi ən dəyərli mətnlər adlayır. Onların arasından isə I, II və III yerlərə layiq görülənlər seçilir. Qaliblərin adları hər il may ayının 28-də elan edilir. Müsabiqədə maksimum obyektivliyi təmin etmək üçün hər il dəyişən münsiflərin adları sonadək gizli saxlanılır və yalnız mükafatlandırma mərasimi zamanı açıqlanır. Həmçinin dəyərləndirmə zamanı münsiflər hansı mətnin kimə aid olduğunu bilmir. Qaliblərə "Nəsimi" mükafatı və diplom təqdim edilir. Hər iki nominasiyada I yerin sahibləri (2 nəfər) üçün təşkilatçılar tərəfindən şəxsi sayt yaradılır. Müsabiqə bitdikdən sonra da təşkilatçılar I yerin sahiblərinin daimi tanıtımı ilə məşğul olur, onların ədəbi agenti qismində çıxış edir. Bundan əlavə, bütün yerlər üzrə qaliblər (6 nəfər) təşkilatçıların idarə etdiyi hər iki portalda daimi müəlliflik hüququnu qazanır. II tura adlamış 20 əsərin hamısı kitab şəklində nəşr olunur.

İkinci mərhələ. Hər il 1 sentyabr-20 dekabr tarixlərində davam edən bu mərhələdə cari ildə dərc olunan əsərlərin, kitabların, tərcümələrin dəyərləndirilməsi həyata keçirilir və onların arasından ən yaxşıları seçilərək mükafatlandırılır. Bu mərhələdə iştirak üçün heç kəs öz namizədliyini irəli sürə, əsərini təqdim edə bilməz. Qiymətləndiriləcək əsərlər yalnız münsiflər heyəti tərəfindən müəyyən olunur. Yekunda hər hansı bir müəllif "İlin ən yaxşı əsərinə görə" (və ya ən yaxşı tərcüməyə görə) "Nəsimi" Milli ədəbiyyat mükafatına layiq görülür.

Xüsusi qeyd: I mərhələdə qalib gəlmiş iki şəxs ""Nəsimi" Milli Ədəbiyyat müsabiqəsinin qalibi", II mərhələdə qalib gəlmiş şəxs isə ""Nəsimi" Mükafatı laureatı" titulunu daşıyır.

Ən çox verilən suallar:

2008-02-05T19:32:00.002+04:00

1. Sual: Müsabiqə obyektiv keçiriləcək, ya ...?

Cavab: Məqsədimiz yalnız və yalnız obyektiv müsabiqə keçirmək və bununla da ədəbiyyatın inkişafına xidmət etməkdir. Qiymətləndirməni 9 nəfərdən ibarət Ekspertlər Şurası həyata keçirəcək. Obyektivliyi qorumaq və kənar təsirləri sıfıra endirmək ücün, münsiflərin kimliyini indidən açıqlamırıq- onların kimliyini yalnız qaliblır elan olunan gün açıqlayacağıq. Dəyərləndirmə zamanı əsərlər və müəllif adları kodlaşdırılır.

2. Sual: Müsabiqəyə hansısa dərgidə, qəzetdə və ya saytda çap olunmuş mətnləri göndərmək olarmı?

Cavab: Nəsimi MƏM-in "Debüt" nominasiyasına mətbu orqanlarda, kitabda, almanaxda, internet saytlarında dərc olunmuş əsərlər qəbul olunmur. Bu qayda müsabiqədə obyektivliyi maksimum qorumaq üçün tətbiq olunur.